Yuhi shaam ki chai par charcha ho rahi thi jab achanak papa ka phone baja.Unknown number hone ke karan papa ne kuch minton ki hichkichahat ke baad apna phone uthaya.Us aur se “Ram Ram” ki awaaz aayi.Baad me pata chala ki gaon se Giriraj tauji ka phone tha.Kuch yaha waha ki baaton ke baad unhone gaaon ki khabar di.Kehne lage kaise kuch log mahamari se bimaar hain,toh baaki bhukmari se.Kisi ek ki toh aaj hi maut huyi.Sunkar papa kuch shaant se ho gaye,mummy toh rone hi lagi.Mujhe bhi bahut dukh huya,rone jaise maan kiya,aankhon me aansu bhi aye par pata nahi kyon veh neeche gire nahi.Bahut koshish kiya,par gire nahi.
Kuch der baad akele me jab pure ghatna ke baare me socha tab samajh aaya kyu nahi gire aansu.Girte bhi kaise? Maa khehti hain aansu toh sirf aapno ke liye girte hain.Yeh paheli suljhane ke baad khud par garv kam sharm zyada ayi.Iska matlab woh gaon mera nahi?Woh gaon wale mere nahi? Apna kahu bhi kaise unhe.Rishtey toh khoon se nahi,nibhane se hote hain.Aur rishtah toh door,in athrah saalon me ungliyon me gina jaye buss kuch utni hi baar baat ki hain maine gaon me rehne wale mere parivar ke uss ansh se.Pehle jab babaji zinda the tab phir bhi saal me ek do baar baatein ho jati thi.Par ab babaji ke guzre chaar saal ho gaye,aur in chaar saalon me na kabhi hame unki yaad aayi nahi unhe hamari.Sirf ek baar gaaon gaye the hum,woh bhi aaj se kuch barah saal pehle kewal teen dino ke liye.Ab toh waha ka kuch sahi se yaad bhi nahi hain mujhe.Sab dhundhla lagta hain.Kuch yaad hain toh buss hamari tuti-phuti neeli rang ki haweli aur pathshala ke maidan me khelte kuch bacche.Unhi bacchon me the Shiv,Bhairavi,Mukta aur Jyoti.Gaon me bitaye un teen dinon me hum ek hi saath khelte the.Bahut masti ki thi.Par ab toh agar unhe samne khara bhi kar do tab bhi na pehchan paayu.Par isme meri bhi kya galti? Unki koi tasveer kaha mere paas.Na unki na gaon ki.Hain toh buss kuch dhundhli yaadein.
Kabhi kabhi sochti hu agar himmat kar gaanth me do jori kapde,chaar rotiyan,jeb me ek ana aur ankhon me kuch sapne lekar na nikle hote mere par-dadaji toh shayad aaj bhi hum wahi hote.Hamari haweli aaj yon jeern na hoti aur main har shaam ussi maidan me khelti.Zindagi kaafi alag hoti par kehne ko baatein shayad kuch kam hoti.