Dil bhar aya ye soch ke, ek din mujhe bhi jana hai. U to paida hone pe ladki ke, khushiyan nahi manai jati. Bojh hoti hai na ladki. Pr socha kuch alfazo ke zariye, shyad kuch badal ke dekhu. Bojh ki jagah fakr banke dekhu. Apne us angan me, jaha ladki badi hoti hai, chord ke apna angan, kisi aur ka ghar bharne chalti hai.
Kaisi reet hai ye jaha apna sab chord ke beti ko jana padta hai. Apne maa-baap se door, ghar basana padta hai. Ye rishte kaise hai, jaha saudebaazi hoti hai. Chand rupiyo ke sath, jaise beti bech di jati hai. Khoon pasine ki kamai juta ke, ek baap apni beti ki shadi krta hai. Kyonki un paiso se usse, kisi aur ka ghar bharna padta hai. Kya itna mohtaj hai mard ka odha, jaha ladki ke ghar ke paiso ke tale dabna padta hai? Ya u kehlo ke itni bojh hai beti, kuch rupiye deke mano use bech dia jata hai. Aj se wahi ghar hai tumhara, kehkar beti ko bida kia jata hai. Uske baad chahe kuch ho, har maike wala usse anjaan rehta hai.
Kyon wo maange puri ki jati hai, jo ladke wale krte hai? Kahi aag me jalakar mar dete hai, kahi maar maar ke jeena haraam kar dete hai. Sharm ati hai aisi soch pe, jaha rishte paiso ke sath taule jate hai. Aisi shadi se kya matlab, jaha dil hi undr se khokle hote hai. Wo gadi chyea, wo TV, wo sofa to wo almari, isi ke oor ghoomta hai wo bebunyad rishta.
Mai bojh nahi hun, mai khud ladna janti hun. Dahej ki mang puri krne ki zrurt nahi, mai khud itna kamana janti hun. Un apahijo ke sir mujhe mat bandho, jo apki beti ko do waqt ki roti na khila sake. Bhot naazo se pala hai mujhe apne, meri barbaadi ke lye paisa mat dena!
Maa tere ghar ki chidiya hun mai, wo log isi jala denge. Dahej ki mang ke peche, tera sab luta denge.
Jinki fitrat me hi gairat nahi, jinko paiso ke aage meri keemat nahi. Uske lye apne babul ko chord, mujhe kahi nahi jana. Aise insan ke sath ghar mujhe nahi basana. Ab yahi waqt hai na kehne ka, jaha pehli maang ayi. Mai khud badhungi, apni kismat se kahungi. Mujhe wo de jise meri zrurt ho, na ki jiski zrurate paise se puri ho. Wo rishta jo abhi juda nahi, wo shadi jo abi hui nahi. Uski maage puri kyon kare? Us rishte me umeedein kyon bhare? Shadi hai to dil se nibhegi. Aisi shadi zindagi bhar chalegi. Daulat ka muh to fr se khul jyega. Aj gadi maangi hai, kal bangla bi usme shamil ho jyga.
Unki maange kabhi poori nahi hoti, jinki niyat me lalach ki kami nahi hoti. Kya shadi ke baad zindgi nahi hoti, do rasmo me sirf kya shadi nahi hoti? Wo shadi jo panno me gum hisabo me kaid hai. Aisi shadi ka na koi haqdaar na koi wajud hai. Aisi shadi ki mujhe zrurt nahi, jaha mujhse zyda paiso ki bhook hai.
Baba, mai ladki hun to kya, majburi nahi. Sahara hun tera, bojh nahi.